石詠莉早前大爆o靚模C小姐和D小姐出現在賣淫名單，因此被陳小春封為「爆石」，但她前晚出席活動時竟自認衰女，表示是講大社會風氣，並非故意唱衰o靚模。同場的周秀娜（Chrissie）對此事甚不屑，指石詠莉為電影歌曲博宣傳。
周秀娜、石詠莉、蕭定一、羽翹、雷凱欣和鄭欣宜等前晚在四季酒店出席伯明翰的春茗晚宴，日前石詠莉大爆賣淫女星名單中，名字有C及D的，因此被陳小春在微博指為「妖精」，又暱稱她做「爆石」，石詠莉對此說：「呢個花名不嬲有，爆石都有好大工程。」
石詠莉：我認衰女
不過，石詠莉竟謂不是故意爆料及唱o靚模，她說：「我係講正面訊息，好多少女年輕人睇錢好重，點知演變成咁，我唔係刻意講飯局，但的確有咁嘅事，點解唔可以講？呢個係大社會風氣，我冇開名，開名仲大件事，我想佢哋反思。」對於被指博宣傳，她說：「可能係我表達得唔好，有誤會我講sorry，我都有責任，我嗰日唔止講o靚模，好多普通女仔都有發生。我唔係博紅博出名，因呢啲賺錢非我所為，總之我認衰女，下次講嘢小心啲，只怪自己太直言。」
Chrissie談到石詠莉爆料，她不屑說：「睇完都覺得頭痛，我家發燒，得閒病唔得閒休息，唔想理呢啲嘢。」是否曾被問飯局價？她說：「我睇報道知佢要宣傳新歌，佢部戲我冇份拍，我只想宣傳我有份嗰部《猛男滾死隊》。」意思是指石詠莉為《3D肉蒲團之極樂寶鑑》唱主題曲而博宣傳？Chrissie說：「好可惜，我要宣傳自己部戲，《猛男》首歌我有份唱，但我都OK滾得。」
周秀娜：唔得閒理
問Chrissie怕不怕C字女星，會被指是她？她說：「唔會，我唔得閒理，冇聽過呢啲嘢。」若有飯局是否應約？她說：「我病，唔想傳染畀人。」她又祝石詠莉新歌大賣，至於花名爆石，Chrissie表示不知道也不想回應。
鄭欣宜則笑言就算有飯局名單也不會找她，她說：「都唔知真定假，係幾得意，可能有，如果有人問我會好開心，代表我靚，升呢。」會應約嗎？她說：「唔會，我係宅女，鍾意喺屋企，但會好開心自己有吸引力。」或者因為她身材好而被吸引？欣宜說：「咁都好，有人搵嘅話我通知大家，一齊去食飯。」
採訪、攝影：王連連