香港樓價升不停，租金與其他大城市比較亦屬高水平，小市民蝸居苦況國際知名，台北市市長郝龍斌（圖）亦慕名而至，明天來港訪問兩日，之後再到新加坡考察。
據講郝龍斌此行主要係考察香港公營住宅，重點參觀項目係已重建嘅牛頭角上邨，唔知郝龍斌有冇機會去感受吓幾十年老街坊嗰種人情味。除咗參觀屋邨，郝龍斌亦會去市區重建局探知館，了解香港市區重建情況，之後再到房委會總部，又會去擬活化嘅中環街市。
睇呢啲嘢，八方覺得只係隔靴搔癢，郝龍斌應該去睇睇香港發水豪宅示範單位，或者家訪香港特產「縮水樓」，對本地房事應有更深刻認識。光華新聞文化中心未有公佈郝龍斌訪港期間會否與任何特區官員見面。