支聯會主席司徒華逝世，香港市民對華叔到死仍堅持平反六四、爭取民主無不深受感動，數十萬市民簽弔唁冊向華叔致哀，當時一眾左派分子及愛國傳媒打手，眼見港人哀思，怕眾怒難犯，唔單止唔敢秋後算賬批評華叔同支聯會，仲要「抽水」大讚華叔係愛國者。不過呢類打手始終改唔到佢哋嗰種左嘴左臉，噚日《文匯報》借批支聯會搞華叔悼念活動，乘機侮辱華叔「不得安生」、「有排先可以真正安息」，令唔少泛民同華叔支持者睇到眼火爆！
人人睇完眼火爆
呢篇叫〈支聯會又搞追思會司徒華「忙過」生前〉嘅文章，標題已經對華叔相當不敬，《文匯報》驚人唔明佢想話華叔，仲要在文前加多一條小題〈不得安生〉，成篇文章主要指支聯會喺維園搞悼念活動，係要「消費」司徒華，就算寫到篇文最後一句，都仲好似驚對華叔未夠刻薄、凉薄，係要加多句話華叔「有排先可以真正安息」。
八方問支聯會代理主席李卓人有冇睇呢篇文，佢好勞氣咁話原來好多人都睇到，人人睇完都眼火爆，事關支聯會早已表明會舉辦悼念活動，因為華叔告別儀式唔可以畀大量支持佢嘅市民參加，再加上有個農曆新年假期，所以要推遲到華叔生忌時舉行。家有人見阿爺要批支聯會，又唔畀王丹嚟香港悼念華叔，於是又再出手，仲連先人都唔尊重，要借侮辱華叔打支記，阿人指根本就係呢班左派打手「消費」華叔，而唔係支聯會！
不過阿人話華叔在天之靈，相信都唔會對呢種左派打手文章動氣，因為佢以往在生之時，都有唔少呢類針對佢嘅惡毒文章，反而阿人相信華叔可能會高興，想唔到佢老人家雖然仙逝，但原來餘威猶在，一眾左派打手仍然係咁怕佢，仲係要寫文去打佢！
mailto:[email protected]