經常強調足球博彩要理智分析，要日日賭都可比較同日同時段場次嘅值博率，可惜今個周末，大家習慣聚焦嘅歐洲列強欣逢弱旅，正牌莊家無奈列作雞肋。英足盃4強曼聯、阿仙奴、車仔同曼城，單W得啖笑，皇馬巴塞咁啱都係1.06倍主W；常賭嘅荷甲阿積士、燕豪芬同川迪一擔擔，這類波講到點好盞嘥氣冇人睇。冇乜方向，適逢本版下周換新裝，今日貼士容後再談，先談歐聯「馬前後炮」。
Whatafinish,whatagame,whatanight.好耐未試過通頂睇波咁興奮過癮！
場內場外，有些人熱有些人冷，當紅射手尹佩斯窄位扳平後，衝去擁抱栽培佢6年多，令佢由涉嫌強姦犯叛逆少年，變成住家好男人既阿仙奴領隊雲格。喺現今唯利是圖嘅足球世道，反口覆舌唔續約又續約仲恃自己好波仲大把，對師徒情仲尊重嘅唔多咯。近一年，受盡批評、無復霸氣的沙皇艾沙維，數分鐘後以後備身份替阿仙奴奠勝，打敗地上最強巴塞，就算下回合落敗出局，粉絲也無憾；賽後從電視直播鏡頭前，大概只有他，低着頭跑回更衣室，不留阿聯酋球場草地多一陣，回味球會這場等了5年多的勝仗帶來鮮見嘅氣燄。沙皇5月到30歲咯，來季去或留，總算整靚啲個履歷表，收起感情玩低調讓尹佩斯搶盡鏡頭，亦不失一位真漢子。
歐聯同聯賽係兩個思維兩個層次，AC國內成績同佢個位鹹濕老細兼國家總理一樣，呼風喚雨，但出到大場面，佢班老人家對住英超唔係最top嗰幾隊嘅熱刺賴晒嘢，輸唔起又雙腳飛鏟又叉頸，同打牌飲酒一樣，遇着啲冇品，朋友再叫都冇下次！仲唔知錯，樁個頭埋去禮拜三嘅另一意軍羅馬1.8倍W，就真係幫你唔到；下周中到國米招呼拜仁，同日有英國三級球隊嘅比賽，係咪一定要買歐聯呢？強如曼聯，根據足智彩今季所有賽事計，暫開到[-1]僅36%，當亞洲盤計，真係輸死人，除非你今季識長追佢哋贏1粒，無論盃賽定聯賽一樣咁勁，場場「和局」3倍幾，下周中紅魔作客馬賽，都似喎。今季英超爭前列亂局，強隊有賠率，管他熱刺定曼市雙雄，有時要鐵石心腸，博冷嗰隊。
馬後炮都只係想反省，識得趨吉避凶，唔好見到阿仙奴畀紐記追番4球就以為班波玩完，上周說過戴亞比被逐可暫當突發事件；結果佢哋贏到你唔信，讀死書如鵬仔就會錯過好多機會。不過兵工廠明天踢英足盃作客甲組奧連特，由4倍變成1.17倍W，加埋會變陣留力周中聯賽對史篤城，上次食飽者，勸睇波好過。其餘英足盃3強，車仔迎愛華頓仲危，拖肥糖遇強越強，相反架車內部唔齊心，主力前途未卜，更望住下周中歐聯作客丹麥，出冷W唔奇。至於曼市雙雄招呼低組別兵，但讓太多，都係玩大炒波膽好過。英冠下周中開快車，續冷敲老虎仔侯城作客葉士域治不敗，英甲狂龍彼德堡同修咸頓，今周一樣睇唔通；西甲最正路可能係今晚華倫迎希杭，博[-1]洩周中畀史浩克追和嘅怨憤。心水冷門，周日荷甲早場飛燕諾赴海牙博爆冷，唔係因為宮市亮喺度就捧，講過賭波冇感情，班波起番啲，3.65倍客W兼[+1]，有質回起就咪錯過。
蘋果波神
語錄：賭波先求賠率不求賽事大小及喜惡，結合賽前賽後形勢戰意，應可趨吉避凶。