誰不想安坐家中便可以有錢入袋，now101台的派錢遊戲節目《撳錢》日前首播即大受歡迎，前晚更有逾六萬參賽者瘋狂投入撳錢潮。商台DJ細蘇（蘇耀宗）和新進歌手徐浩分別於前晚順利過8關答中問題，與249參賽者同時勝出，平均瓜分10萬元獎金，只有399元落袋，他們不約而同要與另外三名智囊團瓜分，每人僅撳得約99.7元，算是趁正月十五攞個新年彩。
熱爆全城的now101台互動有獎遊戲節目《撳錢》，自開波至今備受參加者瘋狂熱捧，每晚參與人數節節上升，該節目自本月9日開始讓now用戶免費試玩兩星期，但下周二起便要收月費55元，為了催谷大家開台，《撳錢》近日不惜瘋狂派錢招客，前晚更吸引逾六萬人在螢幕前狂撳，結果有251名參加者成功答中8條問題，爭崩頭下瓜分10萬獎金，不過每人平均只分得399元獎金，認真得啖笑，商台DJ細蘇也是幸運兒之一，他昨日在電話訪問抵死地說：「真係鬼死咁多。」
贏幸運錢嘔凸萬歲
細蘇前晚撳得399元獎金，昨日他興奮心情仍未減退便返商台開咪，他還拿着四張一百元紙幣拍照，一臉得意。細蘇表示前晚邀請了三個朋友做智囊團，所以將獎金平均分配，他僅得約99元落袋，一張紅衫魚都唔夠，他說：「我會大方啲，三個朋友會分100蚊，我自己唔介意拎99蚊嘅尾數，費事除唔勻。」
對於唔夠100元落袋，但商台同事都戥細蘇開心，昨日紛紛恭賀，並要他萬歲，結果他獎金未落袋即要「嘔凸」，細蘇說：「大家知我贏咗《撳錢》就叫我請食嘢，我雖然未收獎金，而且仲要倒貼，但一樣開心，因為就算100蚊都係luckymoney，冇所謂，倒貼咪倒貼，最緊要大家食得開心。」
細蘇表示這次是第三次玩《撳錢》，吸取過往經驗，他提供了撳錢攻略，他說：「最好係四個人一齊玩，我哋前晚就係咁去咗朋友屋企玩，我哋分工合作，一人負責上高登，一人負責上facebook，我同另一朋友就負責上網搵資料，大家夾手夾腳。」
細蘇讚high過打牌
細蘇指過往兩次答問題都在第一或第二關便被擯走，前晚的問題也比較容易，所以較多人輕易過關，平均每位贏家只分得399元獎金，是八集《撳錢》中獎金最少的一次，細蘇說：「多少錢真係唔緊要，我哋贏出嗰刻好興奮，四條麻甩佬相擁，立即影低電視個畫面留念。以前四個人興打麻雀，但試問打完牌只有一個人會開心，點會四個人攬住咁high。」
食髓知味，細蘇謂會再接再厲進攻《撳錢》，他大力推介說：「呢個遊戲可以增進朋友間友誼，我一定會再約朋友一齊玩，就算贏唔出，其實玩嘅過程都可以學到好多新知識，真係唔錯o架。」
徐浩去茶餐廳祝捷
至於bma前樂隊V成員徐浩前晚玩《撳錢》同樣連過八關，獲得獎金399大元，他隨即在微博自爆中獎，他昨在電話中說：「噚晚我同三個朋友玩，每人拎住iPad上網search，我仲一路同爹哋媽咪通電話，好緊張。」他表示是C君建議他裝now玩遊戲，現中獎他獲分100元，笑言會與朋友嘆茶餐廳慶祝。之後會否晚晚玩《撳錢》再博過？徐浩笑說：「如果唔使出街，一定會開電視玩啦。」
《撳錢》前晚開倉派錢，身為主持的黃婉曼、農夫和盧覓雪昨日返台開廠時，也替得獎者高興，盧覓雪更提出獎金要加碼，她說：「節目設計最初冇諗過一晚會有二百幾人中獎，如果第一條問題就有10萬人參加時，10萬蚊獎金真係唔收貨，應該加碼。」農夫成員陸永笑言：「應該加我哋薪先加獎金。」有指前晚問題較淺致多人中獎，農夫成員C君都認同，他說：「我知細蘇都中獎，呢個遊戲志在大家開心。」
採訪、攝影：比華利、藍文浩