聲音導遊facebook　勁到無朋友

facebook推出「打卡」功能，全城響應接力洗板，可見佢嘅影響力可以顛覆世界。今個星期又有有關facebook嘅新嘢出爐，又係新App？非也，而係講述呢個社交王朝成立史嘅電影《社交網絡》（thesocialnetwork）推出影碟，身為網民，一邊上住facebook，一邊煲碟，特別有Feel！

記者：王震遠

星級大作

朱克伯格搞facebook搞得空前成功，大衞芬查拍《社交網絡》亦唔失禮街坊，前後橫掃咗唔少獎項，聽到咁大嘅名氣，經已有買嚟煲碟嘅意欲。facebook就上得多，背後個故事講乜就真係要溫吓「書」。呢一個係典型嘅因財失義古仔，任男主角上位上到幾勁，最後都係無朋友。故事講述哈佛朱克伯格同好友艾德華做咗一個選美網頁，將朋友嘅相當閃卡咁放上網，任人評分，結果一夜成名。後來，朱克伯格參考溫克勒佛斯兄弟構思建立咗Thefacebook，大受歡迎到慢慢擴張到其他大學。溫克勒佛斯兄弟當然唔服氣，決定告朱克伯格。另一方面，facebook越做越紅，直到人數達100萬人次，原本出錢出力嘅艾德華發現股票被人瓜分，決定對主角提出訴訟，結果庭外和解，最後反目收場。

$159（DVD）
$259（BD）

■艾德華幫朱克伯格計算女生嘅期望值，唔講以為做緊神探伽利略。

■朱克伯格與西恩惺惺相惜，最後成就出facebook大業。

黑得有Detail

唔知大衞芬查係咪想將朱克伯格塑做成宅男第一人，整套片的風格以Dark為主，由一開場嘅酒吧場景，到朱克伯格個私竇，到中間穿插幾場Party戲，總之大部份時間都不見天日，黑黑沉沉的感覺直情令人覺得主角雖然係天才，亦都係個電腦宅男。雖然大量昏暗場景，但睇Blu-ray黑位的控制不錯，雜訊不多，暗位的Detail依然清淅可見。例如戲中一幕警察查牌，全場昏暗只有幾條電筒燈柱射來射去，畫面依然層次分明，兩者對比控制得好先有咁嘅效果。