揸跑車招搖過市當然過癮，不過車始終是代步，實用性大於一切，尤其現今講究環保的年代，一架車仔載齊一家五口，慳油實用，何樂而不為。新登場的，正是賣車賣到開巷的Mazda2，今次經過內外易容後，形象更醒目吸引。
記者：趙慧敏
攝影：林栢鈞
Model：Jancy@Zmodel
車頭變臉
踏入2011年無耐，已經有不少車仔以新形象登場，啱啱先有SuzukiSwift，再來一款Mazda2，睇怕有心出車仔的捧場客，難免要花多啲心思研究吓邊款適合自己。事實上油價高企，一般平民百姓難免睇住荷包做人，實用性高又慳油的車仔自然成為首選，不過競爭咁大，車廠自然要落足心機，先至站得住腳，喺車仔界中份量唔少的Mazda2當然唔會執輸，以2011年新款迎戰對手，雖然說不上脫胎換骨，但確實帶給人煥然一新的感覺，新款保留原來輕巧靈活的設計，但在細微之處，確作出不少修飾，令整體車形更趨時代感，心水清的車迷數數手指，相信都會計得出由上一代已經係2007年的事，至今都有幾年歷史，係時候要給車迷一些官能刺激。以車身而論，新一代Mazda2改款重點集中於車頭位置，鬼面罩換上萬事得家族式的面譜，令車系感覺更加統一，亦令車輛迎面而至時，更具立體感，另外頭燈及霧燈設計更經拉長修窄等變臉手術後，即時媚態盡現。
鋼琴飾面添貴氣
小型揭背車的內櫳永遠更考設計者的功力，在有限的空間中，發揮最大的創意，這方面Mazda一向引以為傲，雖然Mazda2外形的的骰骰，不過空間感十足，坐足五人都沒有侷促感，尤其是改良後的座椅承托力不俗，新款布料圖案，一次過踢走以往的保守味，感覺當堂Young晒。另外中控台亦是另一修飾重點，有無諗過以往只會在幾十萬甚至過百萬的車款中才出現的鋼琴面會放在Mazda2身上，你話格格不入，但不得不承認確係帶出一些貴氣，另外儀錶板雖保留三環式設計，但亦換上金屬味濃的電鍍框框，啱晒年輕人口味。這一代Mazda2沿用1.3公升MZR直四引擎，配合無段變速波箱，容易操控之餘，加減速反應相當不俗，高鋼性及偏向厚實的懸掛系統，雖然最高只輸出90匹馬力，不過駕駛時，依然樂趣無窮，值得一讚是車廂隔音表現相當不俗，諗都諗到一家大細坐埋部車有幾熱鬧，寧靜的車廂，真係幾重要。
Mazda2規格
引擎：1,349ccMZR直四
馬力：90ps/6,000rpm
扭力：12.2kg-m/4,000rpm
傳動：無段變速波箱
售價：$142,990
查詢：28931112（萬事得汽車）