新正頭擺春茗，係上市公司同傳媒一年一度嘅聯誼好機會，「食腦」嘅inhousePR，都會把握時機，順便sell吓自己嘅產品、服務，好似呢排股價靚仔到爆嘅TOM集團（2383）咁，噚日就送咗份令人幾驚喜嘅小禮物畀華華─蘇太XO醬禮盒是也！
做媒體嘅TOM仔送XO醬做紀念品？難道公司轉型？
非也，TOM仔嘅靚太PR阿頭話，查實佢哋旗下華娛衛視有個節目叫《教主來了》，專係介紹靚人靚屋靚嘢食，3月7號新一輯其中一樣會介紹嘅，就係蘇太XO醬，所以佢特登揀嚟送畀大家試吓先。
樽XO醬有幾勁？
Well，蘇太其實就係前立法局議員、新洲印刷集團個主席蘇周艷屏，識飲識食嘅佢，好鍾意宴客，啲老友食過佢公司個大廚秘製嘅XO醬之後讚不絕口，於是佢就不斷試味改良，過時過節送畀老友同生意夥伴，後來因為反應太好，咪索性做埋生意囉！