從吐露港公路轉入大埔道走往城門隧道、尖山隧道，一定會經過沙田新城市廣場外面嘅一段路，呢段路唔算長，但限速五十公里就往往變成影相抄牌陷阱，不知有幾多朋友在此中招，一位小姐Ｙ就試過一年內在此被影相三次，佢揸住架三千cc汽車，踩一腳油上城門隧道就已經足夠罰款兼扣分。左丁山就行得呢條路多，一到新城市廣場附近就收油，慢慢行，保證唔會犯規，但原來守規矩都有危險嘅啫，不少人跟車太貼，自己收慢之時，後面開快車嘅貨車、小巴、私家車在不同時段都幾乎撞埋嚟。
話說Ｙ小姐卒之因此而在兩年內被扣超過十分，收到通知，要去指定駕駛學院上堂，否則可能監禁兩個月或罰錢一萬元，Ｙ小姐唯有乖乖地聽命，揀咗去荃灣一間駕駛學院上堂，一堂（朝九晚五）三百零五元，原來呢啲係一盤生意，每班學員二十人，座無虛席，學院送番五十元超市禮券，爭取好感，亦希望參加者介紹朋友嚟。呢日呢班上堂人士，貌似職業司機嘅中年男士最多，當然個個坐低就覺得冇癮頭，一位男士最多嘢講，佢話飲咗兩罐啤酒，相隔九小時之後先至揸車，點知遇上「卜落」，警察叫佢駛埋去吹波仔，一吹就中，話佢飲酒醉駕，重罪也，罰佢上堂已算夠運，但男士最㷫者，乃係飲啤酒九個鐘頭後仍然有酒氣，認真冇運。
上完堂後要測驗，有二十條問題，可以答錯八條，Ｙ小姐好輕鬆咁答中晒，問佢點解咁聰明，Ｙ小姐話：「唔通要肥我地咩，啲問題全部由導師在堂上講過，稍為留心聽書，已知道全部答案。」於是皆大歡喜，駕駛學院收學費收得開心，學員如釋重負，又係開心，只係啲職業司機覺得學費俾得寃枉。Ｙ小姐話：「都學到常識o架，如果now撳錢遊戲問到，我會識答，如果在路上撞死牛、羊、馬、豬、狗、貓、騾嘅話，撞死邊啲動物唔駛報警？」答案係狗與貓，大概牛羊馬豬騾極少在公路上出現，撞到就係新聞。香港有好多養狗養貓之人，請你地注意嘞，一個不小心走甩咗，不幸在馬路上受輾斃嘅話，司機可以不顧而去。