農曆新年，敏妮同契大佬Kenny一家飲茶拜年，席間Kenny問起，「敏妮，開瓶費你應該知係乜，開罐費你又有冇聽過？」的確冇聽過，Kenny解釋，喺電視見到有間藥房將唔同牌子嘅奶粉，統一「加價」50蚊。不過，如果個客即場將奶粉開罐，證實係自用唔係炒賣，就會畀返50蚊個客，即係收回原價。哦，原來開罐費唔係要個客畀，而係由個客收。
杜絕水客責任理應唔喺藥房老闆度，多人爭買奶粉，藥房老闆坐地起價好合邏輯，「開罐費」呢一招反而搞到藥房老闆俾消委會質疑營銷手法唔合理，敏妮唔係好明老闆搞咁多嘢為乜？Kenny就話，投機炒賣唔持久，藥房做慣街坊生意，靠嘅係口碑，為咗一時賺多啲，唔理啲舊客，唔係街坊藥房嘅營商之道。
奶粉平貴同敏妮關係唔大，但係今次「奶粉荒」，敏妮就同魏力、高明brainstorm，研究吓邊隻股受惠有得炒。可惜冇邊間藥房上市，敏妮提出，卓悅（653）有奶粉賣，點知兩位股壇新星唔知幾時去做過research，居然同敏妮講，卓悅只係賣日本奶粉，嚟掃貨嘅大陸客只係買「A+」奶粉，唔吼日本奶粉，所以唔算受惠。魏力仲話，數嚟數去，概念股都係得和黃（013），因為旗下有屈臣氏。
「奶粉荒」受惠股難搵
問題又嚟，連鎖藥房嚟講，敏妮屋企附近有屈臣氏又有萬寧，以非正式統計，似乎萬寧比較多大陸客掃貨，相信係因為萬寧喺奶粉供應同選擇都多啲。不過，萬寧係牛奶公司集團成員，而牛奶公司又喺新加坡上市……
原來想搵隻「奶粉荒」受惠股都幾難，唔知大家有冇建議？
溫敏妮
http://wanmanli.com/blogs/