世界上最重要嘅支持，就係來自家人嘅愛，只要有夢想，即使面前有重重困難都冇有怕。好似08年贏得F1車手總冠軍嘅「黑帝」咸姆頓，就同細佢7年嘅弟弟Nick感情要好，仲鼓勵患有腦麻痹（cerebralpalsy）嘅弟弟繼續追逐佢嘅車手夢；而家機會嚟喇，19歲嘅Nick已經考獲全國B級賽車牌，喺4月份將出戰今年英國房車錦標賽嘅ClioCup！
腦麻痹影響感官發展
26歲嘅「黑帝」咸姆頓喺F1車壇出道短短4年已經名成利就，第2個賽季即贏得車手最高榮譽F1車手總冠軍寶座，呢一切都深深印喺細佬Nick腦海中，期望有朝一日可以跟隨哥哥踏足賽車壇，向着車神之路努力奮鬥。但是Nick天生有腦麻痹症，患有呢種病症嘅人，身體嘅感官發展、平衡力、認知能力都會有所缺損，早前還要坐輪椅出入。喺講求速度、反應嘅賽車運動，Nick似乎有好大嘅困難需要跨越。
但係身為哥哥嘅「黑帝」，向來「天不怕，地不怕」，鼓勵弟弟勇敢接受挑戰，克服困難。結果Nick喺上星期真係考獲全國B級賽車牌，將會喺4月份代表「TotalControlRacing」出戰ClioCup。Nick很感觸咁講：「我自細就好鍾意賽車，哥哥的成就令我都想做車手，我知道真的不容易，但我想透過自己嘅經驗，可以啟發其他對生命有困難嘅人！」
「黑帝」咸姆頓喺車壇咁成功，而家細佬都入埋車壇，可算為「一門雙傑」，咸姆頓父親安東尼當然好鬼開心，對於Nick晉身車壇充滿信心，覺得佢正正係「複製」咸姆頓嘅成功之路，佢話：「ClioCup為一個很好的平台畀Nick發揮，我知道佢一定會有好成績！」
無腳都可以賽車
現年44歲的意大利「跛腳車神」辛尼迪，自小參與小型賽車，其超卓表現於91年獲F1佐敦車隊賞識，可惜好景不常，他在F1的發展並不如意，之後轉戰房車賽。直至01年，辛尼迪在德國鬥車時遇到嚴重意外，失去一雙小腿。
不過，傷殘並未令他放棄賽車事業，兩年後辛尼迪重返車壇，並以一部油門及制動均安裝在軚盤控制桿上的戰車（上圖）角逐賽事。05至09年的FIA世界房車錦標賽，辛尼迪連續5季成為常規車手，當中曾勝出4個分站；對於失去雙腳仍追尋賽車夢，實屬非常難得。
