預算案下個星期出台，面對通脹升溫同貧富懸殊，各大政黨都要求財爺鬍鬚曾派糖紓困。政府彈藥嘅來源，不外乎畀外滙基金管理嘅財政儲備，同埋外滙基金歷年嚟投資累積所得嘅累計盈餘，計到舊年年底，呢兩筆數分別係5923億同5914億。
華華記得，美國傳統基金會喺年初曾經呼籲，財儲規模只係需要應付12個月政府經常開支，外儲總額亦只係需要覆蓋貨幣基礎兩倍，就能夠支持聯繫滙率，多餘嘅應該撥返去財政儲備，再還富於民！
金管局總裁陳德霖自從09年底上任之後，同曾財爺就琴瑟和諧，噚日趁預算案出爐前，佢罕有咁撰文投稿，重申外儲資產不宜輕易調撥嘅論點。
還富於民 宜撥財儲非外儲
陳總話，金融海嘯嘅一大啟示，就係環球金融市場存在極大不穩定性，無人能夠保證動盪幾時再發生，所以政府財政實力係穩住金融體系嘅關鍵。
外滙基金累計盈餘加埋政府財政儲備有成萬二億，比起10年前嘅7200億，好似多好多，但係佢話本港銀行體系嘅資產，亦比10年前大幾倍，一旦資金流出港元就要即刻用美元支付，所以資產唔可以輕易調撥。咁，華華就好想知，到底外滙基金要揸幾多儲備，至夠頂住外圍嘅衝擊呢？陳總同樣無量化答案，即係越多越好啦！
浸大財務及決策學系副教授麥萃才博士都話，如果政府要還富於民，佢比較傾向用調撥財儲嘅方式，而非外儲喎！所以呢，平民百姓想撳錢，都係睇now101罷喇!
mailto:[email protected]