葡萄牙球星基斯坦奴朗拿度（C朗）向來係墳場姑爺仔，仲當女友衫咁換，但佢竟然轉死性，走去做「跟得男友」。話說C朗（圖左）趁皇馬周中唔使打歐聯，周二就由西班牙飛去美國，陪俄羅斯名模艾琳娜（圖右）上美國名嘴DavidLetterman嘅清談節目。換轉係以前，要C朗做「跟得男友」真係睬你都儍，不過自從做咗老竇之後，真係修心養性。而佢肯陪艾琳娜，亦證明好重視呢段感情，唔會玩玩吓，唔通真係想艾琳娜做佢個小C朗嘅阿媽？