經典風Choke　時光倒流41年

若然話英國mini係車壇可愛經典，咁意大利Fiat500必定係佢頭號勁敵。今年41歲的古董Fiat500，憑住超迷你Size、卡通造型，旁人經過都必然行注目禮再舉機拍照。走進車廂，再望住光禿禿的中控台，你會覺得自己仿似走回六七十年代。

記者：許維雅
攝影：黃子偉、譚盈傑
Model：Suki@GMEModels

好奇興奮非靠高科技

想揸住部車出街博收視率高，唔一定下下林寶及拉利，價錢平平哋的古董車一樣咁勁。好似喺香港較多人熟悉、比較多人揸的Classicmini，每次出現都會引來好多途人指指點點影相，大人細路都會興奮大叫：「架車好細架，好得意呀！」帶給途人歡樂的滿足感，非一般新車可以勝任。
今日介紹呢架剛由英國入口的古董車，不單止尺碼比mini還要再迷你，罕有程度更勝Mini幾條街，收視率當然更高，佢就係1970年出廠的Fiat500。米白色車身、超迷你可愛CuteCar造型，長闊高只有約2.97×1.32×1.32m，不論男女老少見到都忍唔住望多兩眼。車身各配備都保留原裝版本，頭燈、輪圈及側鏡都充滿懷舊味道。話晒係41年前的設計，各配備都需要手動調校，好似車側的雞翼窗、經典的雙摺式軟頂開篷，實在忍唔住手左摸右搞，對住佢嘅嗰份好奇感，毋須高科技配備一樣帶來興奮。

開車非易事　先要識Choke

1975年已經停產的Fiat500比起mini更早，所以市面上要搵番架性能良好的都並非易事，不過即使有架車到你手畀你揸，似乎唔係易事。因為走入車廂，光禿禿的中控台得幾粒掣，全無指示，最搶眼係Fiat的經典單圓錶板，開車前確實要花啲時間慢慢摸。到你摸熟邊個係燈掣、邊個係水撥掣時，你又會發現點解撻匙都着唔到車！
Fiat500的另一經典就係引擎位置，放於車尾的499cc引擎雖然只得17匹馬力，但車身重量只有499kg，行起上嚟依然靈活。打開頭冚有個大油缸及小量儲物位，當然盡量唔放雜物，無謂令迷你爺爺加重負擔啦！