集合咗周潤發、甄子丹、郭富城同陳慧琳嘅3D電影《大鬧天宮》，目前仲喺北京密鑼緊鼓拍攝中，飾演玉皇大帝嘅發哥周潤發，佢嘅戲份一早就已經拍完，但造型喺日前先公開。有別於傳統嘅玉皇大帝，安坐喺靈霄寶殿一身金色龍袍打扮，發哥演嘅玉帝就將金色改為銀色，而且手持龍頭神杖，睇起嚟有啲中西合璧，甚具「國際風範」。
喺《大》片中嘅發哥，不單止會指揮天兵天將，仲會親自上陣，用佢嘅龍頭神杖作為終極武器。當中文戲同動作戲都會同演美猴王嘅宇宙最強甄子丹有唔少對手戲份。
同各人合照
另外，一向親民嘅發哥喺《大》片拍攝期間，繼續發揮平易近人嘅本色，令到劇組嘅工作人員非常開心。佢又不時搞笑，同各人打成一片。發哥完成自己嘅戲份後，同每位工作人員影合照，仲話會抽時間同唔在場嘅工作人員補影，當然大得人心啦。