自由黨表明唔會放棄派叉燒飯益街坊，不過脫黨自立門戶嘅「經濟動力」就大唱反調，召集人林健鋒噚日透露今年會派10人參選區議會，不過唔會派乜派物，質疑派禮冇用。經濟動力現有5名區議員，換言之有5名新丁，林健鋒指新人都係年輕專業人士，已搵傳媒高人與學者訓練呢班準候選人，「執正啲」就會亮相。
屬兔嘅林健鋒雖然犯太歲，不過新年行財運，早前去新加坡賭場「見識」，連贏八鋪21點，發咗一小新年財。雖然貴為立會新賭聖，林健鋒卻話寧願做諸葛亮，強調係「再生」唔係「事後」孔明，即係多做研究工作，重點工作係要政府修訂競爭法草案，否則會反對到底。八方聽聞官府開始考慮讓步，願意與議員跳探戈。