隔牆有耳:習近平做賣樓生招牌 - 李八方

隔牆有耳:習近平做賣樓生招牌 - 李八方

樓價失控,政府出招都壓唔住個市,居屋都炒到癲,何文田居屋屋苑冠熹苑有業主為求放盤突圍而出,竟然出奇招,以國家領導人做「生招牌」,真係出位。

冠熹苑

業主已封盤未能睇樓

八方老友係何文田街坊,日前回家途中,見到一張出位街招,令佢不禁駐足多幾眼。張街招內容係冠熹苑單位放盤,類似街招街頭巷尾數之不盡,呢張街招最特別係以「習主席曾到訪」做招徠,國家領導人習近平都睇過樓咁巴閉?買入呢個盤,會唔會都黐到少少旺氣呢?
賣樓街招冇吹水,國家副主席習近平08年7月訪港時,獲安排家訪兩個家庭,其中一個就係住喺冠熹苑嘅基層家庭,習近平當時送上奧運紀念茶具做見面禮,仲問咗戶主余生居屋樓價、通脹問題,親民騷圓滿進行。事隔經年,竟然仲有人記得習近平到訪冠熹苑盛況,八方老友都嘖嘖稱奇。
八方向該區地產代理打聽,經紀話街招放售個盤應該已封盤,相信約唔到睇樓。冠熹苑2000年入伙,係區內樓齡最新居屋屋苑,單位面積最細不足300呎開放式至最大800呎,小家庭、換樓客都啱。據近日成交紀錄,冠熹苑自由市場呎價約4,000幾蚊,經紀指補地價比率約四成幾,不過放盤唔多,一般少於10個,每月平均幾宗成交。

沙中線出口兼名校網

習近平曾經家訪,對樓價有冇幫助呢?經紀講笑話可能都有o架,不過更重要係未來沙中線何文田站其中一個出口位於屋苑對面,食正鐵路概念,因此業主都好惜售,封盤唔賣好正常。經紀又話屋苑位處34名校網,因此吸引到家長客,「呢個區仲有幾千蚊呎樓賣,真係幾吸引o架」。習近平日後上位坐正後,冠熹苑樓價唔知會唔會更上一層樓呢?
mailto:pf_lee@appledaily.com