我求大俠雖然唔算係車癡，但都知道為咗部愛車好，一定要入又貴又靚嘅油，好似V-Power或者白金無鉛咁；不過，車路士嘅油王班主阿巴莫域治雖然喺1月為車仔注入咗身價高達10億港元嘅「新油」費蘭度托利斯（F托）同大衛雷斯，但部「車」表現依然冇起色，喺前日場英超只係同富咸打和0:0，目前喺聯賽只排第5，奪標賠率冷至15倍，唔通油王入錯油？
大衛雷斯犯天條險累事
車路士喺1月以破英超轉會費紀錄嘅5,000萬鎊引入利物浦前鋒F托，又以2,500萬鎊買入賓菲加中堅大衛雷斯，兩人身價合共9億幾港元。不過，呢兩名新兵嘅加盟，暫時仲未帶起球隊；F托喺首場替車仔上陣輸0:1畀利記。前日對富咸，連續第2場正選嘅F托依然冇貨交，冇入球不特止，最肉酸係好easy嘅機會都把握唔到，結果踢到71分鐘就俾杜奧巴入替，令捧場客好失望。
至於大衛雷斯，喺呢場波首次替車仔踢正選，雖然表現唔錯，仲不時有助攻；可惜一次失誤，足以致命，佢臨完場前喺禁區內侵犯富咸嘅丹普西而被判12碼，好彩門將施治生性，救出丹普西嘅主射，車仔先唔使全失3分。
不過，車仔和波後26戰只得45分排第5，落後榜首曼聯12分，衞冕機會渺茫，足智彩奪標冷至15倍！領隊安察洛堤賽後只敢死撐，話車仔仍有好大機會爭前4，仲話：「雖然杜奧巴今場打後備，但我冇放棄以F托拍杜奧巴呢個鑽石前鋒組合嘅構想。」
車仔今季表現咁差，肥安頂烏紗亦危危乎，佢可唔可以教落去，好可能取決於球隊喺歐聯16強鬥丹麥哥本哈根時嘅表現；牌面上車仔係穩晉級，但以現時車仔個勢，怕且都要鑽石前鋒組合真係發揮到光芒至得。
