做人新抱甚艱難！呢排新春兼撞正情人節，做珠寶零售生意嘅，真係忙到無時停。好似謝瑞麟個新抱謝邱安儀（圖）咁，新年無得放假去玩之餘，仲要落街巡舖，就連噚日情人節，都要同記者食春茗度過，完全係工作行先。所以謝瑞麟（417）由踏入2月至今，整體生意都按年升咗差唔多50%……啲男人去晒邊呢？真係難為了家嫂！
講開謝太，佢搵咗全球微雕大師WillardWigan同謝瑞麟一齊搞crossover，大師早排已經嚟過香港交流，仲已經將粒有100瓣切割面嘅Estrella鑽石拎咗番英國，準備喺上面雕番件藝術品……連鬼佬都係由家嫂招呼，呢啲新抱去邊度搵呢？！