新直四引擎　藍系出頭天

近年最受歡迎的平治車系，非E-Class莫屬。首次與平治近年力谷的環保系列CGIBlueEFFICIENCYE200相對數天，感受新直四引擎與慣性使用的V形引擎有何差別，結果於不一樣的引擎下依然有心有力，油耗更低至每公里$1.02，靜靜將錢袋落你袋。

記者：許維雅
攝影：王文忠
Model：Rika@GMEModels

油耗6.8L/100km真實數據

對於環保汽車新世代的發展，各大小車廠正處於各師各法的階段，這邊廂主力玩混能車，那邊廂就力谷電車，而歐洲品牌則從減磅及燃油技術等研發入手。平治的CGIBlueEFFICIENCY系統，逐步滲透各級別車系作為低門檻款式，透過噴霧式直灑引擎的全新燃油技術，成功減低油耗。但要真正測試到它的慳錢表現，車廠數據唔會有人信，小試一兩段路亦難以求證，所以我們長測幾日搵出答案！
揸住E200由將軍澳工業邨出發往新元朗中心，途經大老山隧道，燈位唔算多，大部份係高速公路，全程以Comfort模式行走50公里，油耗竟然低至6.8L/100km，每公里只需$1.02（以每公升汽油$15計算），實在令人有驚喜，如果你下下踩盡再收油則另作別論！至於到車多燈位多的市區就做唔到咁慳油了，往來市區一般要9公升，但E-Class屬大碼中型豪房，要負擔1,615公斤的車重，油耗表現經已勝過好多同級車。

起步爽快　唔怕無力水

一般人對E-Class推出E200CGIBlueEFFICIENCY都存在兩個疑慮，第一係怕1.8公升引擎孭唔起咁大部車；其次就係它的直四引擎會比V形引擎遜色，簡單啲講都係擔心影響性能，怕唔夠力。
配備Turbocharger引擎的E200，負重上斜依然有力，加上新技術有提升燃油速度的功能，起步爽快反應敏捷，於高速公路踩深油門試力水，已有輸出源源不絕力量的感覺，但想真正展示力量，轉用SportMode仲好玩，最緊要係唔覺得燒油燒得特別快；不過要求有V6引擎的Powerful的話，就難以相比，當行走90km/h以下時，轉數錶一般維持在2,000轉下，100km/h以上時就會升到2,500轉，V6引擎好少會咁聽話呢！
講完揸車感覺，講番好多車主關心的實用程度。雖只屬E-Class入門版，豪華配備唔多，但寬敞舒適的真皮櫳，令後座乘客坐得自在。而電動調校座椅、免提藍牙、自動轉向頭燈都是日常的好幫手。尾箱雖無揭背車咁靈活，但540m3的容積已很夠用。惟獨覺得美中不足的，就係咁大架車只配16吋合金輪圈，似乎不太夾，我定會補$5,500改換17吋，但就用多點油呢！