與美國三藩市朋友通電話拜年，恭喜發財之餘，投資A講到現在健康要緊，搵錢其次，叫左丁山多啲運動，但不可過於劇烈，以免傷及腰部、背部，臂部、膝頭等等。佢在美國見到不少老友勤於打網球、高爾夫球、籃球、跑步，好似好健康，但人到五十歲後就開始出現背脊痛、手筋痛、腰痛、膝頭痛等等症狀，啲醫生唔知幾好生意，換膝頭（kneereplacement）手術甚為盛行，現在美國發展咗一啲新技術，叫左丁山上網搵一間公司嘅網站睇吓，睇唔明可以請醫生朋友睇埋一份，上Google打ConforMIS.Inc就得。佢順便申報利益，佢間生物科技基金公司有一啲ConforMIS股權嘅。啱啱在飲茶之時，餐廳R行落陸羽樓梯，狀甚辛苦，面有痛楚之色，諗吓佢年青時打籃球打得多，曾是南華隊球員，中年又勤打高爾夫兼行山（hiking），哎吔，時候到了，膝頭用到差唔多啦，飲茶之時佢問醫生C如何做kneereplacement，於是提醒佢上ConforMIS網睇吓，搵啲資料參考都好吖。
醫生C原來並唔係「開刀派」，唔主張立即開刀施手術，因為「假膝」始終有風險，未必可以用足十五年之後先至再換，佢嘅講法又同一兩位骨科專家意見不一樣，我地啲凡人真係聽到頭昏，不明所以。醫生C又係奇人一個，三十年前跟過王亭之學紫微斗數，通道家之術，後來讀埋中醫，畀病人吃西藥之餘，兼講埋中醫養生補氣之道，如保持老而彌堅嘅狀態。我地成班老友每個星期同佢飲茶，梗係唔客氣咁向佢問東問西，爭取中西醫常識啦。
中醫藥在香港復興，已係大趨勢，唔駛睇《壹週刊》嘅朱玲玲、葉蒨文到上環搵中醫嘅報導都知。好多中環OL鍾意睇新式中醫──即係配藥用藥粉冲滾水，唔駛用成包中藥慢慢煲成個鐘頭咁麻煩，你知啦，啲時代女性邊度識得煲藥呀。風氣所及，一位八十後幫辦話希望申請入中大讀中醫，如果成功，就會放棄鐵飯碗，全職讀書，左丁山知道咗，為之愕然，不過青年人有咗積蓄之後，唔去買樓而希望追求自己之真興趣，不妨鼓勵之。