噚日係情人節，新地（016）旗下apm商場請嚟一對洋人模特兒，佢哋一身希臘神話人物嘅造型，鬼死咁搶鏡，當然唔少得示愛送花嘅場合啦！唔怪得租務部一姐馮秀炎都笑到咁開心啦。
講開開心嘢，馮秀炎同華華講，apm商場舊年生意額有30億，按年升一成，喺人民幣升值嘅情況之下，內地客出手的確闊綽啲，生意額爆燈，同胞們功不可沒，但係都唔可以忘記本地市民嘅需求。
今年apm投資8000萬，吸引更多後生仔捧場。迎合本地客口味之後，先再增加點對點內地主題購物團，希望額外帶嚟5000萬生意額，估計今年生意額可以再升10%至15%……新地咁照顧自己友，果然係佢哋個口號咁─以心建家！