為咗加強企業管治，港交所（388）最近建議上市公司董事會當中，要有三分一獨立非執行董事。網上股評人DavidWebb唔止一次批評本港上市公司嘅獨董，大部份係由大股東選出嚟，唔夠獨立。噚日佢再撰文，用3隻分別視而不見、聽而不聞同有嘢唔講嘅馬騮，嚟形容唔夠獨立嘅獨董，非常抵死。
講得興起，Webb燒埋港交所3位董事嗰叠。雖然佢曾經話過，立法會議員石禮謙身兼16間上市公司董事，質疑佢有無足夠時間應付，之但係，Webb唔認為港交所要限制每個人可以擔任幾多間上市公司董事，因為呢樣嘢完全在於董事本身有幾多職務在身。
佢舉例，一個全職行政總裁或立法會議員或行政會議成員，未必有好多空閒時間可以好好應付一、兩個獨董嘅職務。相反，一個無其他職務嘅退休律師或會計師，就可以應付5個以上嘅獨董職務。
Webb咪就係想話，港交所獨立非執行主席夏佳理，仲有獨董鄭慕智同許照中三個，做緊壞榜樣！喺港交所年報睇到，本身係律師行合夥人同行會成員嘅夏佳理，係另外8間上市公司嘅非執董，仲要係4個政府委員會嘅成員。鄭慕智係律師行高級合夥人，總共坐住11間上市公司嘅董事會。正職係證券行董事總經理嘅許照中，亦係6間上市公司董事。講到咁白，Webb想講咩，大家心照啦！
羅嘉瑞：點搵咁多獨董
香港上市公司商會主席羅嘉瑞噚晚喺春茗酒會就呻，家陣要搵有能力又有經驗嘅獨董已經好難，好多人係畀面先至做，如果仲話要有三分一屬於獨董，去邊度搵咁多供應？
至於限制每人可以做幾多間上市公司嘅獨董？使唔使設限？羅嘉瑞就話要因人而異，好似退咗休嘅，就會有多啲時間handle多啲嘢，最好由公司自己衡量，最緊要嗰位獨董有能力、時間同有心幫忙。
李華華
mailto:[email protected]