now諗出條新計仔吸引收視率，就係設立101台玩「撳錢遊戲」，每晚送出十萬元。左丁山聽到之後，以為問答比賽啫，有幾難呀，於是搵一晚坐在電視機面前，參加遊戲，點知第二條問題係問身份證號碼下面，有一個W字，表示乜呀？左丁山就係唔識，立即被淘汰出局，答案原來係「代表澳門出生人士」喎，點解聽都未聽過？醒起大編輯就是澳門出生嘅，打電話問佢：「身份證有冇W字呀」？等咗一陣，大編輯答：「有噃，係AW。」「咁樣W代表乜呀？」大編輯答：「唔知噃，冇考究。」哦，澳門出世嘅大編輯都唔知，左丁山唔算好失禮。
第二晚又嚟玩過，去到第三條，問題係「下列馬匹贏馬比率邊隻最高」：「靚蝦王」、「盈綵繽紛」、「活力先生」、「精英大師」，左丁山梗係識答「盈綵繽紛」啦，冷不提防四位主持人之中，有盧覓雪女士，佢竟然話：「可惜我唔係左丁山！」唉吔，乜左丁山在讀者心目中係馬匹專家咩？原來有幾千位觀眾答咗「精英大師」，立即被淘汰出局，左丁山沾沾自喜，以為呢晚有機會嘞，但第五條係問，用十萬元買嘢，買邊樣買得最多：雙羊米兩公斤、刀嘜油、800毫升強生洗頭水及威路士果汁。唉吔吔，左丁山好耐未去過超市，完全唔識價錢，亂撞之下，又試出局。
睇落玩呢個遊戲，要搵齊老中青男男女女，有專人上網搵料搵答案，先至可以過關，學生豪來電話幾條難答嘅無厘頭答案都可以在四十五秒之內上網搵到。
如果網站唔塞車嘅話！呢個遊戲嘅獎金自不然來自廣告贊助商，現時電視台每晚有三萬幾觀眾login，節目期間，不能轉台，確實係可以向廣告商保證costperthousand（每千名觀眾廣告費）嘅，但係在問題難度設計方面，應該前四易，後四難，唔好在第二條就淘汰三萬人出局，等啲觀眾大量流失。如果呢個節目成功，其他電視台會唔會仿效呢？唔會噃，因為除咗now之外，其他無綫、亞視、有線都冇互動（interactive）功能，想學都唔得。