有亞洲BookerPrize之稱嘅第四屆英仕曼亞洲文學獎最後五強決選噚晚出爐，獲1994年諾貝爾文學獎嘅日本作家大江健三郎果然以巨人姿態入圍，作品係《換取的孩子》。曾經幫張藝謀寫劇本嘅中國編劇兼作家畢飛宇亦憑《玉米》入選，其餘三位決選者分別係日本作家小川洋子，印度作家ManuJoseph同埋TabishKhair。
最終邊個贏出穩袋近24萬港元獎金，3月17日揭曉。八方用電郵問畢飛宇有冇信心打敗諾獎得主，佢話能夠同大師一齊入圍已經好高興，提「打敗」兩字，只會令佢血管爆裂，因為古語有云：文無第一，只有喜歡同唔喜歡咁話。
雖然佢好期待同文學前輩見面，但係八方收到風，剛剛76歲嘅大江未必會嚟香港出席活動，會唔會改變主意呢，就要睇大會嘅牙力嘞。