阿爺家陣一見樓市就喊打，尤其內地一線城市更加打個唔停，但係震嘅又點只樓市，深圳房產界近期就連人事都震埋。業務集中喺深圳、兼且高層變動多多嘅佳兆業（1638）最近就宣佈，執行董事金潔（圖）已經辭職，不過強調公司同金小姐無意見分歧，只係對方想搵下其他發展啫。
睇番佳兆業個網站，金潔主要負責有關投資、收購同境外企業重組嘅嘢，而且經驗同來頭都唔細。金小姐揸住加拿大投資經理嘅專業資格，仲有18年金融業經驗，喺外資行德銀、瑞信、加拿大皇家銀行做過之餘，仲喺商務部做過4年對外投資嘅嘢，非常資深。
事實上，佳兆業自從喺09年12月上市以嚟，變天事件真喺唔少。上市之後一個月，當時嘅副總裁曾曉華就辭職，副帥換完又到主帥，跟手6月就連總裁葉劍生都離任，由黃傳奇接掌。而根據內地傳媒報道，舊年11月，佳兆業委任韓振捷做執行董事，同時又做埋東北部總裁；到12月，本來喺華僑城房產做營運總監嘅劉付志明，亦過檔佳兆業做營銷高管。