雖然唔認係「家臣」，但素來「護主」不遺餘力嘅工業界議員林大輝，送虎迎兔繼續為唐英年叫陣。
噚日與傳媒拜年時，秉承作風口誅唐唐最強勁對手，指香港已回歸多年，應該由「唐」人治港，冇理由仲「英」人治港，又指香港人應該「振」興祖國，冇理由要「振」興「英」國，「如果係英人治港，咁就真係車毀人亡喇」！林大輝口中嘅「英」人，是否梁振英呢？佢話聽者可自行演繹，總之一定唔係麻鷹嗰隻「鷹」！
恥笑減廚餘再窒鬍鬚曾
林大輝鬧人勁度猶如唐山大兄起飛腳，莫非梁振英行情驟然看漲？佢強調下任特首「跑馬仔」行情一向十分清楚，仲話政協常委陳永棋貼士最準確，相信稍後人大政協兩會後，情況會更明朗。八方翻查資料，陳永棋最近「押注」唐英年係下屆特首大熱，對梁振英不予置評。
話雖如此，其實梁振英近年真係好勤力，在個人網誌發表多篇疑似政綱，最近仲鼓勵各界減少廚餘，林大輝對此不以為然，笑笑口講：「唐梗係治英，英人去食餸尾啦。」弦外之音，令人莞爾。恥笑完梁振英，林大輝不忘「招呼」埋冷馬鬍鬚曾，指鬍鬚曾否認香港「官富民窮」，係與民情脫節，叫高官應該反省吓點解成日計錯預算案盈餘條數，否則愧對市民。
下屆特首選舉明年3月舉行，有人估計唐唐本年底辭職參選，林大輝卻認為待明年農曆年前先宣佈都未遲，最重要係同時公佈內閣班底，至於佢有冇可能入閣，林大輝形容自己性格「飄逸」，唔適合做官，但如果祖國徵召，唔排除會諗諗。
爆儍強寸嘴過劉吳惠蘭
林大輝要求政府修改《稅務條例》39E增加廠家免稅額多次遭拒，經常與財經事務及庫務局局長陳家強「儍強」口角，林大輝稱唔知道「儍強」下屆有冇得留低，總之覺得「儍強」表現唔掂，又指「儍強」與他通電話時也曾出言不遜，內容比劉吳惠蘭「恐嚇」謝偉俊更「石破天驚」，一旦公開，震撼程度直逼汶川大地震，為免傷亡枕藉，非最後關頭佢唔會爆料咁話。
mailto:[email protected]