網上遊戲咁hit，家陣揸住部iPhone都有大把遊戲玩，呢個市場真係唔講得笑。
時富（1049）噚日就宣佈，佢哋將會同美國OberonMedia以建立合資企業形式結盟，話要喺中國搞番個世界級嘅遊戲同內容分銷平台，勢要食盡條水。
根據協議，時富旗下摩力集團會用大約7800萬，向OberonMedia收購蘇州嘅遨龍信息89.7%，而OberonMedia亦會因為呢個交易，而揸番1%時富股權。
時富董事長關百豪（圖）講到明，移動互聯網利潤勁，一定要喺呢個市場大展拳腳。
OberonMedia係全球最大嘅移動開發商之一，有大量休閒遊戲客戶群，仲生產同分銷網路、手機、iTV同零售等休閒遊戲。