由公民黨後生仔組成嘅青年公民，噚日有五名熱血青年拉住「慶祝埃及人民戰勝獨裁政府」banner，諗住到埃及駐港領事館，為經過18日抗爭後，成功推翻前總統穆巴拉克嘅埃及人民慶祝。點知五人未到領事館門口，先遭保安截停阻止上樓，話領事館因星期日冇人開工。最終青年公民經一輪游說後，保安至肯放行，但全程派人跟實監視。
去到領事館門口，保安又話因為領事館喺商廈內，叫佢哋唔好嗌口號。過去唔少政黨政團去到領事館門口，不論有冇人都可大嗌特嗌，難怪呢個安排令到呢班青年打個突。好彩，五人最終都成功爭取開香檳，總算冇白行一趟。