隔牆有耳：巴閉　煲呔食麪保鑣護駕 - 李八方

昨日中午12點，八方喺銅鑼灣時代廣場，見到煲呔同太太拍拖去「翡翠拉麵小籠包」食晏，同行仲有另一位家人。其他食客要排隊等位，但貴為特首，當然唔使自己排，粗重嘢交畀保鑣代勞，搵到位，特首夫婦至現身。
佢哋坐喺近門口位，三個人點咗拉麪同小籠包。煲呔保鑣見記者出現，就話唔好騷擾佢哋，特首今日冇嘢講喎。佢哋逗留咗40分鐘，埋單200幾蚊。走人時，煲呔對記者嘅提問當聽唔到；

有位市民行埋去想攞簽名，都被保鑣阻止。唔係民選嘅煲呔拒民千里唔出奇，不過，情人節前，佢同曾太都隔開廿呎遠，各有各咁，喺保鑣同實Q護送下離開。