新正頭好多公司都會搞吓團拜呀、春茗呀咁，前晚又係恒生銀行（011）一年一度嘅傳媒春茗，筵開咗5席，恒生當然又係以佢哋聞名嘅蛇宴款待大家啦！
當晚，蛇羮照樣出色，不過最令華華驚喜嘅係，原來恒生一眾賓架都係唱得之人，開首就由梁太（恒生副董事長兼行政總裁梁高美懿）帶領班高層高歌經典金曲《紅日》，梁太仲祝傳媒朋友新一年「兔」氣揚眉。
至於要數最唱得之人，華華就首選恒生執行董事兼個人銀行業務主管梁永祥（圖），佢獨唱張學友嗰首《舊情綿綿》，真係令到在場人士聽出耳油，而且仲有在場嘅記者向佢獻花㖭！華華收到小道消息話，呢首係梁生嘅飲歌嚟o架！
之後到其他人唱，梁生都間唔中攞支咪唱埋一份助興；雖然有在場朋友笑佢係「咪霸」，但係華華覺得，佢既然有把咁美妙嘅聲線，梗係要同大家分享吓啦！仲有，今日係情人節，梁生唱嘅情歌，啱晒提醒啲戀人時刻都要相親相愛！