公民黨議員陳淑莊Tanya舊年10月同男友甩拖後，今日要過8年來首個單身情人節。分手後自嘲剩女嘅Tanya，噚日出席兔友協會一個情人節活動，睇見一啲被遺棄嘅棄兔時，難免觸景傷情，聽到有隻兔仔俾人喺某年2月14日情人節拋棄，因而被改名做「無情情」嘅古仔後，更覺得「棄兔」好陰功。
幫兔情侶證婚
八方問Tanya今日會點過？Tanya就叫大家唔使擔心，皆因佢今日好忙，要由朝早開會開到晚上六點半，之後會同仍然期待拍拖嘅朋友一齊慶祝。Tanya又話明，今年唔會守株待兔，因為拍拖呢啲嘢唔可以冇，只係有啲嘢唔急得，一切隨緣咁話。不過，佢因工作太忙同男友分手、單身近四個月後，工作繁忙嘅情況有增無減。
Tanya噚日聽到有兔仔主人指，養兔要每日抱兔仔兩至三粒鐘時，即時話冇條件同兔仔建立同居關係，「唔計瞓覺時間，我返屋企都唔夠兩三個鐘」。Tanya又自爆一向眼淺，寵物一旦有乜冬瓜豆腐，「我一定喊到死，所以都係唔敢養」。
幫人證婚嘅通常係事務律師，作為大律師嘅Tanya冇機會幫人證婚，但噚日就替一對兔仔證婚，幫手宣傳一個叫「安全兔」嘅計劃，鼓勵兔主人為兔仔做絕育手術，再經兔協替佢哋同其他兔仔配對，令兔仔有個終身伴侶，減少棄兔。
咁兔仔點解要配對呢？兔協成員兼兔仔媒人Joanna解釋，兔仔同人一樣有唔同性格，如果隻兔仔地盤意識強，就要配隻個性腍善嘅兔仔，否則打大交。如果隻兔仔性格隨和冇乜所謂，可以選擇嘅伴侶就多啲。同人一樣，兔仔家庭背景都好重要，如果兔仔主人不善梳毛，幫兔仔揀對象時，就千祈唔好揀隻長毛嘅，否則有排煩。
Joanna又話，兔協資源有限，一年最多只能接收250隻兔仔，雖然適逢今年兔年，多咗人領養，但現時若想將兔仔交畀兔協，都要排隊等半年，所以大家養兔仔前，最好先諗清楚係咪適合。
mailto:[email protected]