朗尼上周六曼市打吡嘅倒掛金球技驚四座，連費Sir都話呢球係佢喺奧脫福球場咁多年以嚟，最精采嘅一個入球。除咗費Sir大讚之外，同朗尼有過一手嘅妓女珍妮亦露點贈興。
其實，朗尼今次呢個倒掛，被費Sir視為歷來喺奧脫福所見最精采入球，真係唔算誇張，話晒呢場喺曼市打吡戰，份量十足，而金球為紅魔鬼帶來最後勝利；當然，由倒掛金鈎所產生嘅入球，難度自然相當高，呢幾個因素，都使費Sir、甚至朗尼本身，都視為一絕金球。朗尼之前扭計唔續約，仲搞到可能會離開紅魔鬼，的確令到唔少奧脫福球迷由愛變恨，失去唔少民心，但睇嚟倒掛金球後，一切都會改變。
朗尼力壓簡東拿C朗
我求大俠亦覺得呢記屬難得金球，而英國傳媒亦將它同以前喺奧脫福球場所出現過嘅金球，進行一次網上投票，候選嘅有基斯坦奴朗拿度08年對樸茨茅夫嘅鬼影變幻罰球，同埋「大帝」簡東拿96年迎戰新特蘭時，禁區頂巧妙笠死門將入網。不過，結果睇嚟都係朗尼嘅倒掛壓倒性贏出，得接近6成嘅得票率，比起第2位簡東拿嘅妙絕笠射多出3倍有多，連球迷都選佢，所以費Sir都唔係為咗激勵朗尼士氣，先至大讚佢，而係實至名歸。
人紅自然有人抽水；據講曾經同朗尼有過性交易嘅珍妮（右圖），喺埃及度假期間大騷本錢，喺沙灘同泳池都展示驕人身材，仲豁出去露兩點；適逢朗尼出現呢記金球，再次成為英倫大紅人。珍妮今次露點timing仲勁過朗尼打倒掛，食住舊相好個勢收宣傳之效。唔知朗尼會唔會翻啅，教佢點樣倒掛呢？
