當89歲高齡的何鴻燊仍然可以精靈地周旋於四房之間，103歲的人瑞邵逸夫爵士精神奕奕地在螢光幕前向觀眾拜年，年屆60的人當然可說是壯年。香港政府未有與時並進，死守公務員60歲退休年齡，結果像郵政署前署長譚榮邦等前公僕，一夠鐘就要走人，懶理是否仍然「有心有力」。此地不留人，自有留人處，譚榮邦最近投向新民黨懷抱，年過半百再起步。
政府退休政策已過時
保持政治中立是公務員一大守則，多數退休公務員也信奉「群而不黨」。在官場打滾逾30年的譚榮邦卻罕有地成為政黨一員。他不諱言：「個黨字對我哋班政務官嚟講，真係好恐怖。」並預計入黨以後，令政府見黨即逃，「好似委任諮詢委員會時，政府邊會有胸襟委任我哋呢啲政黨人。」
歐洲去年底那場暴風雪，促成譚榮邦的決定。譚榮邦說，新民黨主席葉劉淑儀在他退休後不時「敲門」，但他未有動心；去年12月他飛到英國看歌劇，剛巧撞上大風雪，湊巧葉太此時向他發動電郵攻勢，邀請他為香港獻計。「如果嗰時我好多街去、好多博物館可以行，相信結果未必係咁，因為當時朝早真係冇嘢做，先有個機會諗吓入黨是好是壞。」最終黨是入了，歌劇也看了足足24套，英國之旅意外地「滿載而歸」。
大風雪，其實只是他入黨的催化劑；政府「過時地」規定公務員60歲退休，亦是誘使譚榮邦加入政黨的潛藏原因。「家60歲好老咩？好多比我仲老啲嘅人，60歲先開始啱啱做啲新嘢之嘛。既然政府嗰度唔要我，我咪循第二個方向去做嘢囉。退休公務員唔係奇怪嘅動物嚟o架，我呢啲性格又入唔到老人院嘅！」
氣頂唐唐車毀人亡論
入黨，也不是一時意氣。08年底退休後，譚榮邦仍然關心時事，也不時為政府的失誤以及傳媒的報道「動怒」。「有時瞓醒覺起身，一睇見啲報紙就好，點解啲報紙會咁o架呢？有時政府做咗好嘢，都應該support（支持）一下，唔可以完全反o架，我覺得自己都可以為香港做啲嘢。」「做啲嘢」包括在政黨做研究，提高本港議政質素，頭炮是檢討現時政府架構下的不合理現象。最近令他氣上心頭的，莫過於政務司司長唐英年對80後的「車毀人亡」論，「唐司長講嘅嘢有市場o架，但係點解咁睇眼高手低呢？你搵啱題材但係咁樣噏嘢法真係盞搞，我第日都要搵人鬧佢個寫手。」
有政務官友好得悉他入黨，問他是否為參選鋪路？譚榮邦回應對方一句：「如果你認為我會去參選，真係有眼無珠。」他形容自己在新民黨也是「試用期」，有可能因為某個議題意見不合就離開，「但相信短期內冇乜衝突」。
記者 許偉賢