上年情人節撞正大年初一，拜年同拍拖兩頭唔到岸，今年終於可以同另一半靜靜地過二人世界。有車嘅，唔通仲去迪迪尼同海浪公園同人逼呀？我就鍾情直踩流浮山，無喧嘩人群亦無屏風樓，兩口子倚偎欣賞全港最靚「鹹蛋黃」，天氣稍凉勝在暖暖情意搭夠。
記者：徐影龍
攝影：陳陶鈞
Model：LaYing、Suki@GMEModels
車輛提供：VolkswagenHK
海天一色絕頂氣氛
上年拖友仔真係幾踢腳，日頭拜完年，夜晚又要趕出街同伴侶慶祝情人節，四周圍仲聽到恭喜發財，何來浪漫氣氛呢？今年想補數，推薦有車之人遠征流浮山，唔係去食海鮮買生蠔，而係直入白泥，望住香港買少見少兼一望無際嘅海天景色，深深吸番啖新鮮空氣，兩口子相伴一起迎接MagicMoment嘅來臨。天氣雖稍凉，但夕陽金黃色餘暉灑遍地上，飛鳥悠閒地追逐，情景美得令人暖在心頭，白泥彷彿昇華成伊甸園。
白泥唔止欣賞日落夠詩意，最正係夠靜夠避世，雖然同場唔止你一Pair識搵靚景，但沿路有多個避車處，同樣可欣賞絕佳黃昏靚景，大家各佔山頭互不騷擾，情到濃時錫番啖都唔怕隔牆有眼。
屯公轉藍地直入流浮山
好多人未去過白泥，其實唔難搵，大部份人會由屯門公路轉直入青山公路洪水橋段，經過藍地沿田廈路便可駛入深灣路直去流浮山，由迴旋處第一個出口就可直駛至白泥。
小鋼炮穿插迂迴山路
已經唔係第一次踏足白泥，到今日仍然係我首選嘅拍拖勝地，除因路程夠遠，可作遊車河之外，附近亦唔算偏僻，白泥入口已有齊廁所及士多，夜晚玩完亦可行番出流浮山食飯，順道買番樽蝦膏畀阿媽做手信。
大長途踩入流浮山，跟福士借來天之驕子GolfGTI，除紅噹噹成朵玫瑰咁鮮艷搶眼外，亦因大部份人今日已開工大吉，五點收工，揸住架210匹GolfGTI，過海行足45公里，仍然趕得切入白泥睇日落。由港島區出發，由西隧到3號幹線，行屯公一直駛至藍地，再行5分鐘已到流浮山。穿過迴旋處轉入白泥，路面迂迴難行，單線行雙程，需避車甚至倒車入避車處，幸好GolfGTI的骰又靈活，遇到大泥頭車都毋須上壆避車，加上DSG波箱反應，一小段直路加速，再於彎前收慢，完全順滑流暢。
VolkswagenGolfGTI
引擎：1,984cc直四＋Turbo
馬力：210ps/5,300-6,200rpm
扭力：280Nm/1,700-5,200rpm
傳動：六速DSG+/-波箱前驅
售價：$318,000
查詢：36989688（VolkswagenHK）