白鴿黨噚日一行百幾人，晨早十點幾喺寒冷天氣警告加埋落雨下，走上山頂道花園，舉行半籌款半旅行嘅新春行大運活動。率領黨員一邊震一邊行山頂徑近一粒鐘嘅黨主席仁哥，噚日好幽默咁面對又凍又濕嘅天氣，話咁樣行山最理想，「一定唔會熱親先啦」。
不過，一架白鴿黨北區嘅旅遊巴，行到半路喺山中間跪低咗，搞到約40人遲大到。有民主黨人笑稱，呢班仁兄其後都有上山頂，有冇行足全程就唔太清楚，喺噚日惡劣天氣下，可能咁樣至係真正行大運。
滿意年宵攤檔表現
難得一班黨友凍到震都要步行籌款，仁哥話籌到幾錢尚待統計，但有民主黨人相信，呢個每位盛惠138元的半旅行團中，只有50元會捐畀黨，其餘要用嚟應付旅行開支，黨最終可能只能籌到幾萬元。仁哥就話，民主黨嚟緊籌款情況理唔理想，要睇黨每年3月嘅獎券籌款反應至知。仁哥又話，單睇維園年宵民主黨攤檔嘅表現，反映政改方案通過後市民反應唔錯，籌款數字較去年有增無減。