有冇發覺，敏妮近排經常都提到人民幣，主要原因係，敏妮有唔少朋友都係中港兩邊走，同佢哋出嚟食飯飲嘢，都會聽到佢哋呻，每次返大陸換錢，同樣金額港幣，換到嘅人民幣一次少過一次。香港人使人民幣就梗係唔見使，但收人民幣就係另一回事。
寓意感情如人仔般升值
講開人民幣，今年農曆新年，一位經常穿梭中港做生意嘅長輩畀咗封人民幣大利是敏妮。記得細個嗰陣，有位uncle每年都會封一封10蚊美金嘅利是畀敏妮，每次收到，敏妮都開心到不得了。
一張10蚊美金，對敏妮嚟講，唔單止係封大利是，仲因為細個少接觸外幣，所以份外覺得與眾不同。
不過，後嚟呢位uncle移民，敏妮就冇再收到美金利是喇。估唔到今年拆利是，敏妮可以重溫細個嗰時嘅興奮。講真，家陣就算收到美金利是，相信都唔及人民幣利是咁受歡迎。所以最近有朋友收到手帕交嘅「紅色炸彈」，問敏妮有乜嘢禮物比一般「人情」突出，敏妮就建議送「人仔」。
敏妮一向實際，水晶擺設、套裝茶具，嘥位又唔實用，敏妮唔建議佢買，最實際就係cash或者禮券，最近見有銀行出咗人民幣禮券。諗到自己收人民幣利是都咁開心，相信朋友嘅手帕交收到人民幣做賀禮都會有啲驚喜。
唔好話敏妮市儈，其實用人仔做禮，寓意深遠o架，港紙係咁貶值，相反人仔價值與日俱增，代表祝福一對新人感情好似人仔咁不斷升值嘛！
溫敏妮
http://wanmanli.com/blogs/