一年一度嘅香港體壇盛事渣打國際馬拉松，下個禮拜先正式舉行，但噚日喺旺角行人專用區，已經有一大班健兒率先冒雨跑嚟跑去，仲個個托住支疑似氧氣樽物體幫助呼吸。睇真啲呢班人唔係跑手，而係地球之友發起嘅「爭氣」運動成員，佢哋嘅目標非常之簡單，就係想政府速速更新已經過晒時嘅空氣質素指標。
唔想歷史重演
前事不忘，以往都試過有大批馬拉松跑手，因為頂唔順本港污濁嘅空氣，喺賽事途中身體不適。地球之友就話，馬拉松路線經過旺角、中環同銅鑼灣三個設有路邊空氣監測站嘅區域，單係今個月頭10日，表現最好嘅中環竟然都有87%時間，污染指數超過80。真係唔敢想像大批跑手不適嘅歷史會唔會重演！