隆成集團（1225）有高息及超厚現金墊底，加埋業務高增長，趁呢期股價跌，唔怕買。隆成主打嬰兒及幼兒相關產品產銷，兼喺祖國拓展零售業。單係2010年上半年度（6月底止），隆成純利就翻超過半番，到5905萬銀，業績靚仔到爆燈。係咁易計數，隆成全年度純利起個孖到1.2億銀，預期PE得8.6倍，相對同業平一半有多。
又隆成最新手頭現金3.3億銀，完全無借貸，係現金牛一族，而集團家陣保守預測息率講緊5厘，相當唔錯之餘，抗跌防風力亦進一步加強。再講，隆成一向派息慷慨，若果2010年下半年度純利，比上半年度仲好，相信息率回報仲高。呢轉買隆成，以集團2010年度預期PE12倍做目標，隆成要見1.90元，現價（1.38元）嘅潛在回報率37%，PE仲係未有耐追上同業。
渝港折讓大炒落後
渝港國際（613）最新NAV每股0.25元，現價（8.10仙）折讓67.6%，已經有唔錯折讓墊底。而呢期報載所見，好似中環呢啲優質地段嘅租金節節上升，兼且唔憂客路。渝港家陣透過渝太地產（075）揸住中環世紀廣場及尖沙嘴彩星中心。呢兩幢物業，真係有排可以重秤，渝港嘅折讓肯定唔只咁少。呢轉博炒磚頭渝港落後，上望一粒臣，較現價升23%，渝港折讓仲未上到50%。
錢雋