唐司長在青年會議演講，指斥八十後，好似老竇教仔咁樣，年紀大之人，睇佢演講辭，可能有同感，冇乜點，但係活躍之社會活動分子，就覺得可怒也，一於示威抗議，對司長口誅筆伐。以政治角度觀之，唐司長係二○一二年特首候選人大熱門，比其他人領先十幾個馬位，按道理應該力求穩陣，騎住隻領前馬，小心行事，唔好差錯腳就算，輕鬆過終點啦，那管後面啲馬打鞭打到拍拍聲。唉吔，唐司長不知聽邊個軍師講，在不適當的場合作不適當的發言，送一個藉口畀八十後狂插，依家民望下跌到五十以下，何必呢。唐司長幾年前有隻愛駒「大殺手」贏一千米，如風捲殘雲，創下時速紀錄，成個短途馬王咁款，點知後來隻馬腳骨裂，被逼退役，就此前途埋沒，司長以後養嘅馬，就冇乜威風過咯。
司長篇演詞末段，有lendmeyourears一句。左丁山讀中六時，係咁意讀過一年英國文學（於是嚇到唔敢報考呢一科），老師教莎劇JuliusCaesar，Brutus向羅馬人演講，開頭第一句就係“Friends,Romans,countrymen,lendmeyourears”。後來沈少（沈旭輝博士稱呂大樂教授為呂老，於是可以稱呼沈博士為沈少啩？）在明報發表一篇給唐英年的信：〈Lendmeyourears,whatwentwrong?〉內容引述不少政治哲學名人，駁斥唐英年，點知又有一位LSE嘅政治學碩士生李同學（八十後）投稿明報，指沈少引述有疏漏，懷疑沈少曾否讀過經典名著。沈少於是又發表長文，以諷刺形式書之，唔知有冇人睇得明。
引用lendmeyourears，惹起筆戰，又幾好睇喎。牛津大學出版社有一本書，就係叫做《LendMeYourEars》，編者AnthonyJay，在九六年出版，至今已出到第四版，幾好賣o架，政治文稿捉刀人（ghostwriter）最好人手一本。牛津呢本書嘅副題就係“OxfordDictionaryofPoliticalQuotations”，西方古今政界名人傳記嘅名句應有盡有，例如阿里士多德“Manisbynatureapoliticalanimal”及“Povertyistheparentofrevolutionandcrime”睇吓埃及局勢，就知道呢兩句經得起歷史考驗。