"受讓半/一 曼城射3注"
馬會近年好識得包裝所謂本地keyrace（關鍵場次），甚至吸引到一啲非核心馬迷投入賽馬，算是成功；好似上周三谷草，上半場連場爆冷，大部份人注碼輸得七七八八，去到下半場大熱卻抬頭，尾場兩大谷草新興力量對碰更正路到痹跑一、二名，派彩得啖笑；小弟現場所見，越夜北風越刺骨，能忍到尾場純欣賞兩匹佳駟單打獨鬥又會有幾人？忍到手，過關又下注守到尾門贏錢，我想還有點睿智；但臨場睇馬，賽事走位評述員，每以高八度頻率，嘩嘩聲話你知埋門邊隻馬落飛，少啲定力都難齋睇。好嘞，馬會今天又喺媒體煲大摩兩隻今季5捷馬同在尾場角逐，兩隻蛤乸邊隻會贏，賠率應唔會好分；沙田日草多潛龍伏虎，未必好似上周三咁，嗰兩隻馬喺前面單打獨鬥咁正路。呢場馬6點前會跑完，大摩脾性，較冷一匹多數掂，考吓眼光，1分20秒多啲就知；但接住食個晚飯，仲精采，有玩足個半鐘既英超曼市打吡，曼聯讓到半/一，情況極似上周車仔對利記熱倒；更離奇係曼城比利記人腳更齊整，更銳；紅魔又有中堅里奧倦勤，曼城最銳、最唔老利費Sir嘅尖刀泰仔，俾國家隊教練層話態度唔好，周中唔使踢國際賽，呢啖火會加倍爆發咯！相反，曼聯今季真係走樣，我唔會計佢哋主場同對賽往績仲有好大優勢，賠率懸殊係取捨主因，下盤、[+1]同和波3注，一注和波，三分一機會有3.5倍，大摩隻尾場明星馬「甜將」，同場有13匹對手，獨贏有冇3.5倍？
"唔識縮住踢 阿奴好「狼」"
嫌英超keyrace難估，小弟認為下半季同曼城一樣，有力追趕紅魔，剩番阿仙奴；原本上周六4:4一戰應被打殘，萬料不到曼聯去到尾場輸波，心理上反勝，對小兵主攻不守氣燄無損，戴亞比被逐可暫當突發事件，今迎挫敗曼聯嘅狼隊，臨場見對家若心雄更可重押大勝波膽。兵工廠[-1]有1.62倍，同曼聯贏曼城賠率相若，最重要，阿仙奴兩大主將法比加斯同尹佩斯，周中國際賽免戰，今場在早段盡情狂攻，贏到兩粒後，先換走留力迎戰下周中歐聯「地上最強」巴塞隆拿未遲。
"「虎」吞普雷 森林漸似「1哥」"
英冠也有心水關鍵場次，周六侯城穩勝普雷斯頓，前者借到唔少好手喺下半季頂檔；相反普雷斯頓今季散晒包尾，連正選門將都去埋愛華頓，做好降落英甲準備；周日榜首戰森林作客「1哥」昆士柏流浪，唔信後者由頭帶到尾，森林勢猛，賠率卻懸殊，同曼城一樣，可博包括和波嘅3注。
"周日尾場 波圖有錢分唔「拉」"
上次禮拜日押皇馬同華倫波膽收萬幾分，過吓榜首癮，再提大家，英超熱門馬會開得更熱，相反華倫同晚熱W冇乜人吼；下周中打歐聯，今次避西甲，捧葡超班霸波圖，作客贏布拉加；波圖今季唔放鬆放領，誓重奪失去一季既聯賽冠軍，歐洲賽又轉戰壓力較細嘅歐霸，面對防守唔叻既布拉加，食髓知味，博2:1，3:1波膽。
蘋果波神
語錄：賭聯賽要識打長久戰，能捉到下半季財神球隊，方是中線贏錢之道，今天點題球隊唔得，亦未損信心。