喺菲律賓脅持人質事件中頭部受重創嘅Jason梁頌學康復理想，煲呔同多位高官每逢大時大節都去屯門醫院探佢，但就畀屯門醫院嘅員工批評高官做騷。醫管局主席胡定旭（圖）噚日就趁住醫管局新春團拜解畫，話自己好多時探完Jason都冇通知傳媒。
講開Jason，胡主席話年三十晚去探過佢，仲專登去咗鏞記買叉燒飯，又買埋Jason最鍾意嘅燒鵝髀同芝士蛋糕，一齊食團年飯。肥胡形容Jason聞到燒鵝髀嘅味就即刻流露出好滿足嘅笑容，仲自己拎住隻鵝髀大啖大啖咬。肥胡又爆料Jason媽媽梁太怕燒鵝「毒」唔敢俾個仔食，但見到個仔食得咁滋味，冇所謂啦。