試過困未？呢樣睇嚟極之平凡嘅意外，如果話你知，五人當中有一個係魔鬼，佢仲會將你哋慢慢殺死，咁你又驚唔驚？2月15日到場嘅新碟《升降凶間》，筆者已感受到戲院以外嘅另一種驚慄，尤其當內嘅人被逐一殺害，黑麻麻畫面下發出嘅5.1Surround聲效，感受如同身在幽閉空間，夜闌人靜更得人驚。睇完後，唔好嚇到行樓梯返屋企呀！
記者：陳國輝
黑麻麻 感覺逼真
可能你覺得：「唓！套戲得80分鐘咁短，而且大部份場景都喺入面發生，好悶啫！」但如果話你知，呢套戲班底係《鬼眼》、《屍城30夜》同埋《死亡直播》嘅鐵三角導演，信心又返晒嚟未？
好老實，色彩艷麗嘅CG動畫真係無乜，但佢會迫使你用心聯想一啲恐怖場面，其中一幕最值得留意係當有人死亡前，內嘅燈會出現猛烈閃動，跟住畫面會突然一黑！殺人過程需要你想像，但最得人驚係黑麻麻情況下，仍然有玻璃碎裂、激烈碰撞嘅聲音出現，而且逼真程度更仿似發生喺你隔籬，如果你裝埋套有靚Bass嘅5.1，我估你未必敢熄燈睇！
Bonus交代人物背景
一般驚慄片多以聲效嚇人，兼無厘頭殺人，甚少交代情節！不過《升降凶間》大部份時間以劇情為重心，真係睇少一陣都唔知點解班友要死！
如果你真係唔明，除咗Replay睇多次，查實Bonus已特別收錄幾段刪減情節。但留意，佢唔係平日嗰種多餘兼無關痛癢嘅片段，入面交代咗幾名角色嘅背景，等你更明白佢哋死前做過啲乜，同埋點解魔鬼要將佢帶走！
Profile
畫面：2.40:1
音效：DTS-HDMasterAudio5.1、DTSSurround5.1
特別收錄：刪剪片段、故事解構、惡魔會談、黑夜系列序曲
$148（DVD）/$268（BD）