最近走了一轉首爾，就更感東京勢危，護膚品市場已經被韓牌平價搶灘成功，現在連韓牌時裝亦作正面侵略，仲要侵得好勁！尤其是冷物類及褸款，style直逼Topshop，摸上手質料更勝一籌，再睇睇價錢牌，抵到拒絕能力都無，走訪弘大兩間小店以證事實。
記者、攝影︰吳美美
Model︰Cindy@Starzpeople
鳴謝：韓國觀光公社
鋪雪小店任摷衫
弘大一帶，已經被遊韓人士列入一級進攻範圍，衫褲鞋襪護膚品手信，完全可令你韓圜一掃光，尤其是時裝小店更屬高危地帶，小記就是踩入了「DreamLoft」這個地雷，銀包被炸。
剛剛開店約有半年，本身負責設計的老闆金智洙已經在狎鷗亭、明洞都有開店，但始終處於弘大才能將其魅力發揮，亦覺得弘大女生着衫風格同自己設計十分match。
先吸引小記的，是因為她那鋪了雪的外圍，喺度搵靚衫感覺好特別，走入店內，橙色燈光即時變warm，內裏又放滿如小木椅、木馬、拼布等小物，小角位置擺得好有日式小店feel。不斷試衫摷衫老闆店員又無任歡迎，真係喺屋企都無咁放肆。
力推闊身衫
店的設計好warm，亦都反映喺設計上，內裏90%是自家設計，其餘引入的10%都是韓牌。最為力推的是闊身冷衫設計，拎上手已經有幾件想直接拎去埋單，最欣賞是將兩種物料互拼，如針織大花圖案襯上灰色sweater，抓毛豹紋料拼黑色sweater，衫身又無過份oversize，而且塑造到vintage舊舊哋的風格，幾有歐美風，最緊要價位維持港幣二百幾三百，Topshop閒閒哋收你double，有時間的都要睇睇眼鏡及襪款，幾十蚊貨仔好過甚麼happysock多多聲。順帶一提，店外有百幾蚊貨仔給大家尋寶，走前不妨睇睇。
記者BestPicks
DreamLoft
地址︰首爾市麻浦區上水洞90-9
西橋洞小店 淨色褸款最強
西橋洞這條街開了很多小店，但就如旺中一樣，買衫風格類同，但踏入二月就開業足足十年的Sibuya就有過人之處。單睇舖面以為是賣vintage衫，但原來無vintage呢回事，平均來講，褸款淨色無添加項目最強，單是一件camel色長褸已經好殺，有淡淡Celinefeel，先賣二百幾，膊位長度啱晒亞洲人。家陣韓國人好hit有帽長身軍褸，成街都係，但呢度就搵到denim款，有毛毛厚身又保暖，mainpoint係出街起勢同人撞衫。仲有記得走去店櫃望望，有時啲襪款幾得意，由於係sample貨只有一對，唔使怕返到嚟喺加老威又撞款。
Sibuya
地址︰首爾市麻浦區西橋洞347-17
名牌商場平衫小店
作為一個標準自由行客，對外國商場應該採取無興趣政策，但對首爾時代廣場除外，起初以為她是單純賣brand場，原來唔止咁簡單，位於B1位置有類似東、南大門風格的賣衫小店，亦有類似街邊賣冷物、手袋小檔，最緊要有24小時E-Mart同一大堆平價護膚品牌，甚麼SkinFood、EtudeHouse、Aritaum都有齊，又同時相連新世界百貨，唔想喺天寒地凍的首爾街頭shopping，呢度係小記會推介大家去的shopping據點。
時代廣場
地址︰首爾永登浦區永登浦洞4街441-10
FashioninSeoul
溫馨提示：如果你發現夜晚成排韓國人在搶的士，但有部黑的偏偏停喺你面前問你去邊，而旁邊的韓國人又無乜反應時，就千祈咪上，因部車可能有蠱惑，隨時落車唔見幾萬銀！
TravelMemo
持特區護照或BNO免簽證。韓國領事館：25294141
濟州航空現時來回首爾機票$1,700起。 http://www.jejuair.net/
1,000韓圜約兌6.9港元（文中價錢已折算港元）
220V，兩圓腳插座
韓國
首爾
下周多雲，-3至6℃
