立法會噚日按傳統宴請煲呔同高官出席新春午宴，大玩潮語遊戲，由議員同高官鬥估潮語。由化身「潮人」嘅李卓人帶領嘅議員隊，一開波即捷捷領先，加埋台下公民黨陳淑莊提水，不論CHOK樣、「打邊爐」等潮語都全部答中。
「攬炒」一詞難倒全場
由發展局局長林鄭率領嘅官員隊成績卻失禮，一開波即被個「囧」字難倒，加上陳淑莊聽從黨魁吩咐，停止畀貼士，台上官員即時無聲出，搞到主持比賽嘅立法會主席曾鈺成都忍唔住笑講：「呢個字，最啱用嚟形容現時幾個官員個樣。」
到搶答環節，林鄭見議員隊大比數拋離，即搶答「毒男」何解，指「即係宅男，成日匿喺屋企嗰啲」，點知畀曾鈺成指同標準答案唔相符，裁決佢答錯，「好多唔係好毒嘅，都匿埋喺屋企啦」。
至於「攬炒」一詞，就難倒全場官員議員，曾鈺成笑指冇理由，「如果黃毓民議員喺度，佢實識答啦」。台上精采，台下議員充當花生友，指兩位疑似特首候選人唐唐同梁振英雖然坐埋一枱，但全程零交流，「連眼神交流都唔覺有」。
