情人節係送玫瑰畀心上人嘅日子，分手嘅人，可以送上折枝玫瑰。社民連前成員李偉儀號召其他想退黨嘅同志，趁今日社民連舉行會員大會，一齊踩場向社民連遞上退黨書，暫時未知有幾多人響應。
社民連以紅玫瑰為黨徽，李偉儀形容社民連已變調，如「玫瑰折枝，理念早夭」，呼籲對創黨理念不離不棄嘅黨友「退黨保良知」，應該拿出決心共同遠離「該片根本不再值得留戀之地」。
雖然決心退黨，不過李偉儀稱部份人可能仍會參加今日嘅會員大會，追究捐款賬目混亂問題，但為免場面失控，佢提醒踩場者要依會議議程論事，唔好人身攻擊，有口舌之爭。為抗衡新一波退黨潮，社民連主席陶君行發表主席感言，叫黨友撫心自問，當日為何入黨，如果係為咗改善基層困境、對抗官商勾結，呢股熱情唔應該因為毓民等人退黨而冷卻，又指近日黨禍無謂，教人啞然失笑。