被小小超李澤楷視為旗下now寬頻電視秘密武器遊戲節目《撳錢》，預計大灑過億作獎金，前晚節目由一名幸運兒獨得十萬獎金，參加遊戲的人數較首播日急增近9,000人，節目播映時有不少觀眾上網搜尋資料作答，因而造成網絡大塞車。
李澤楷一向視now台的直播遊戲節目《撳錢》為2011年重頭武器，其玩法等同互動式的《百萬富翁》遊戲。節目已於大前日播出首集，之後由星期二至日每晚10時35分開始，至本月20日now用戶都可以免費試玩。透過電視台自行開發的ipman系統，觀眾安坐家中就能參與比賽，只要答中每晚由15人智囊團開出的8條問題，就能贏得10萬獎金。
由於問題內容不乏一些冷知識及時事常識，就如首集當中兩條問題分別問到「香港銀行公會最新統計，以下哪區的自動櫃員機最多？」及「101號巴士線，由觀塘裕民坊開出後的第6個站是哪一個？」網民為求在45秒內從九巴及銀行工會網站上找答案，令網絡瞬間出現大塞車。
馬啟仁心急送十萬
該節目的參與人數亦由首日17,000多人，激增至前日第2日播出的26,000多人，而前晚節目的十萬元獎金，已由節目主持之一馬啟仁（Keyman）昨日親身送到鰂魚涌給得獎者。由於玩法簡易收錢快，相信會掀起一股像當年由《百萬富翁》開創的尋金熱潮。
Keyman昨日送完十萬獎金心情興奮，他說：「因為最初試機都係幾千人，唔知過萬人嘅時候會點，而主持每晚都係冇稿，好講求大家之間嘅默契，同埋每晚都好想送錢出去，有個完美嘅結局。」Keyman又指主持《撳錢》後，令他覺得學海無涯：「我家覺得自己好無知同好多嘢都唔識，諗起學海無涯呢幾個字，我諗諗吓都應該去進修一吓。」
曾任足球評述員的Keyman表示主持《撳錢》與講波感覺截然不同，他說：「以前就要分析出場陣容同場比賽，要專業一啲，家就可以剔除咗呢個框框。」問到Keyman身邊的朋友會否經常問他取貼士？他表示：「初時都有o架，我哋四個主持人每人只會知道兩條題目同答案，之後就唔可以同其他三個人討論，加上一入廠就要交出電話，唔可以上網同打電話。同埋我講題目時唔可以輕率咁表達一啲意見，驚會畀錯貼士觀眾。」Keyman指自己都想於放假時參與遊戲，他打算到朋友家中一齊玩，他說：「我自己同家屬係唔可以玩，但又好想玩，我覺得呢個節目嘅其中一個好處，就係令一班人一齊去做一件事。」
C君接收題目斷六親
節目每晚有四位主持，每位主持獲分配兩條問題及答案，其中一位主持人C君就揚言保密程度猶如警察辦大案一樣，他說：「當獨立收到兩個問題同答案之後，就會同幾位負責對稿嘅同事困喺一間房度，之後所有短訊、MSN、上微博同講電話，都會有人係身邊聽住睇住你。」
C君笑言自下午5點打後收到題目到晚上11時多節目結束這段時間，可以用斷六親來形容。對於前日播出的第二集C君加入不少高登網站文化，例如大叫人做「巴打」，令網友歸屬感大增。C君表示不擔心會有其他收費電視台有樣學樣，製作同類形節目對打，他說：「我哋構思到發展呢個咁勁嘅ipman系統製作經年啦，人哋要追都係幾年後嘅事。」
now台歡迎敵台對撼
對於觀眾搜尋答案引致網站大塞車，now香港頻道副總裁杜之克昨接受電話訪問時說：「好多人會用網絡嘅搜尋方法，但我哋冇特登令人哋嘅網站登入唔到，好多香港網絡嘅設計係唔預太多人喺同一時間登入，我哋又冇理由遷就，出問題就惟有唔太頻密地指向某機構。」至於獎金會否再加碼？杜之克說：「如果參與人數再激增，我哋係會討論嘅。」會否擔心其他收費電視出招對撼？他笑說：「真係嘅話係好事。」
採訪：何永寧
攝影：陳慧安
過8關搶10萬
now101台遊戲節目《撳錢》掀起一片觀眾搶答熱，其實8條問題包羅萬有，要連過8關也不容易，前晚（2月10日）第二集的題目如下，讀者不妨試玩作熱身。
Q1 如果今集沒有人成功撳錢，獎金將會如何處理？
A：做員工花紅
B：加落下一集
C：捐去公益金
D：揼落鹹水海
Q2 香港身份證上，出生日期下有「W」，代表持證人？
A：擁有香港入境權
B：擁有香港居留權
C：報稱在澳門出生
D：報稱是香港孤兒
Q3 根據土地註冊處紀錄，下列哪個屋苑，今年最高成交呎價並未超越25,000元？
A：天璽
B：擎天半島
C：凱旋門
D：君臨天下
Q4 「香港郵政」會拒絕接受哪種郵件？
A：附有鈔票
B：算命廣告
C：載有水蛭
D：附有鑽石
Q5 網民稱哪位古人為Johnny？
A：蘇軾
B：唐太宗
C：杜甫
D：孔子
Q6 以下哪一樣有鷓鴣成份？
A：鷓鴣酒
B：鷓鴣菜
C：鷓鴣斑
D：鷓鴣麻
Q7 非法營辦醫院首次定罪的量刑為
A：罰款一千元
B：罰款一萬元及監禁六個月
C：罰款十萬元及監禁兩個月
D：罰款一百萬元
Q8 一個正常成年人，肺氣泡的表面面積，大約相等於
A：北京天安門廣場
B：跑馬地馬場
C：標準雙人網球場
D：麻雀檯檯面
答案
Q1：B
Q2：C
Q3：B
Q4：B
Q5：D
Q6：A
Q7：A
Q8：C