白鴿黨主席何俊仁年前被人襲擊，幸好保住性命，贏得「鐵頭仁」之譽，八方新正頭見到仁哥，噚日向佢拜年時，驚見仁哥面上貼咗張藥水膠布。新年流流，「紅」運當頭，即時問候仁哥因乜事又見紅？
仁哥好客氣咁話有心、有心，澄清今次唔係受傷，只係身體有啲無名腫毒，鼻頭受污糟嘢感染而生出一粒大瘡，雖然已睇醫生，但未見好轉，惟有貼塊藥水膠布防止進一步感染。仁哥又指呢粒似係暗瘡，可能係過年前為街坊寫得太多「青春常駐」揮春，正是醜嘅唔靈好嘅靈，臉上即現青春痘。黨友甘乃威指仁哥九成係新年時食得太多煎炸食物，搞到暗瘡大爆發，祝仁哥今年花開富貴，發過豬頭就真。