踏入兔年娛圈喜事一宗接一宗，繼李嘉欣誕下麟兒後，28歲饒舌歌手歐陽靖（MCJin）也於今晚在美國迎娶圈外女友Carol。新郎哥下月返港時除會開派對跟香港老友慶祝外，更將接拍無綫新劇《LaughingGor》，跟謝天華一齊拍檔搵食。
早前本報獨家報道歐陽靖將於今個月在美國迎娶拍拖多年的圈外女友Carol，事後MCJin在網誌多謝各方祝福，默認婚訊。據知，MCJin原來今晚（美國時間2月12日）在美國娶老婆，昨日準新郎將一對史迪仔與女友的結婚公仔照片放上facebook，獲大批fans送上祝福。
先留美錄音
消息指出，MCJin結婚後，將先留在美國為新碟錄音，雖然他低調結婚，未有邀請香港圈中好友出席，但下月MCJin返港後，將會再跟一眾香港老友食飯慶祝。據悉，他下月返港後將工作不斷，除將再為無綫J2台主持節目《兄弟幫》外，更會為無綫拍攝電視劇《LaughingGor》（暫名），飾演謝天華的下屬。
記者昨日致電《LaughingGor》監製莊偉健求證，他說：「係呀，MCJin有份做，謝天華係刑事情報科嘅教官，MCJin係其中一個學員。」問是否知道MCJin今個月結婚時，莊偉健笑說：「我知佢結婚，但就冇講幾時囉。」
拍LaughingGor
至於有份參與《LaughingGor》演出者還有劉松仁、陳法拉、徐子珊、黃宗澤、郭政鴻和狄易達等等，問新劇會否是《學警狙擊》或是電影《LaughingGor之變節》延續時，莊偉健說：「我哋只係攞番個人物嚟做，係一個全新古仔，當謝天華上次假死，原來佢去咗內地做卧底，破咗單大案之後返香港，做咗刑事情報科嘅教官。劇裏面陳法拉做謝天華女友，個樣好似佢以前死咗嘅女朋友，係一個全新角色，預計下個月中開工。」
採訪：葉雪