譚詠麟（阿倫）近年已默認二奶Wendy的地位，還不時談及兩人的兒子曉風，同時阿倫也悉心保護低調的元配莎莉。但前晚溫拿演唱會尾場上，阿倫在fans鼓勵下打破禁忌，首次公開感謝莎莉及Wendy，更眼濕濕直認：「做錯事嘅係我。」令她們多年來受盡壓力，阿倫更借用自己金曲有感而發說：「情憑誰來定錯對？」
一連八場的「溫拿38大躍進演唱會」前晚在紅館舉行最後一場，全場爆滿，不少圈中人如鄺美雲、鍾鎮濤（阿B）舊愛樂易玲、林建名和蔣麗萍等捧場。阿B請來嘉旺竹巴法王睇騷，他開騷前到後台跪下迎接法王，法王送上白巾給阿B寓意祝福。
「佢哋嘅生活好難」
溫拿五虎在首場互爆情史，阿B取笑阿倫是「happytogether」，擺他元配莎莉及二奶Wendy上枱，但之後幾場他們都收口，似怕激嬲阿倫。前晚再到互爆情史環節，阿倫即默不作聲，接着台下先有男觀眾向他大叫：「做個真正嘅男人！」再有女觀眾大聲說：「唔使驚呀。」
阿倫聞言後有感而發說：「我要多謝一啲人，首先係媽咪，一直以嚟大家都話我係25歲，但佢就當我15歲。第二個就係我身邊嘅女人，佢一直以嚟幫我穩定大後方，穩定內憂，令我可以向前行，做好我嘅事業。你哋睇我好自由自在好舒服，但世俗始終有世俗眼光，呢個眼光令到佢哋嘅生活變得好難好細。」說到此時，阿倫眼紅紅嗚咽說：「衷心希望傳媒畀啲空間，雖然係食得鹹魚抵得渴，但嗰個係我，做錯事嘅係我，情呢啲嘢真係好難講，情憑誰來定錯對？希望你哋當我係一個朋友，畀空間我哋。」
溫拿四虎呆若木雞
其他四虎站在阿倫身後呆若木雞，可見他們未有預到他會說心底話，此時陳友遞毛巾給阿倫，但他接過後一手扔開，再走到台的後方，稍作平復，四虎馬上轉話題扯到阿B身上。當晚其中一位嘉賓是許冠文，他上台大演棟篤笑說：「希望你哋38年後再唱，到時都只係83歲，仲細過何鴻燊，仍然記得歌詞，但跳舞未必咁叻，可能要跳輪椅舞。」
許冠文又引用賭王何鴻燊近日在「分燊家」事件中所講的言論取笑五虎：「你哋用大網向觀眾利是，十足係robbery，係搶劫者。」安哥環節，先有樂隊Mr.出場跟溫拿合唱，之後草蜢三子壓軸出場，眾人又唱又跳大玩crossover，結果唱到近凌晨12時才完場。
「同佢哋鬆一口氣」
慶功宴上，阿倫即成焦點，問他是否一早預備會講那番話？他說：「我冇諗過，係有感而發，大家成日咁恨講，咁我係溫拿出身，喺呢個場合講都合情合理。」為何突然如此感性？阿倫說：「大家咁多年，我覺得係同佢哋鬆一口氣。」至於台上一番話是指莎莉還是Wendy？阿倫未有正面回答：「我喺兩邊咁多年，感情都好深厚，外界嘅focus成日追住佢哋，佢哋都有尊嚴同感覺，仲要出嚟o架嘛。」阿倫坦言曉風已長大成人，早已明白一切。
阿倫透露家人曾因傳媒追訪而被嚇到在街上亂跑，最終由他親自打電話給有關人士擺平，阿倫嚴肅地說：「如果有乜嘢意外，我一定會私人追究，講得出做得到。」他表示家人早前已來看騷。
採訪：何慧斯 攝影：陳俊強
